Luke 23
Avat keil onen Siu keil amulamun Iesu vaha en kot onen Asuv Paelet a
1Hetetamen vasi keil koa amul en kot onen Siu keil, amea ka amulamun Iesu va mulomal en meten asuv Paelet, koa mul losil kat provins ten out Sudea. 2Evus, keil avit lati mini sakien tatisa keil koa avit Iesu mumoni avit, “Komai mevotini keke meatin ekek mul ling rendemien keil tatisa min Siu keil. Kei mul ring koe keil keke anahultei takis min Sisa ka kavmen onen en out Rom. Ka kei mul viteni vit kei vi Mesaea koa Ahi rie lati vamai vahi asuv houlu tai.”3Sakini, Paelet vis Iesu vit, “?Mukave? ?Anatin keke keik kovi asuv houlu onen Siu keil?”
Iesu vit kesi vit, “Suval etin koa koviteni.”
4Evus, Paelet viteni min asuv keil onen pris keil ka min vangi meatin keil enek emun vit, “Inau narvotin etai tounah vatisa vaha kat meatin ekek.”
5Ka keil asel kutut kat Iesu keih tamun mini avit, “Hihiseien onen mul sakin meatin keil amul uvae kat keil eris. Kei mum rohtoh eni en provins ten out Kaleli, ka kosa mai mumoni en out ekok emun en provins ten out Sudea.” Amulamun Iesu va ven Asuv Houlu Herod Antipas
6Navong Asuv Paelet longe mukok, kei vis keil vit, “?Anatin keke meatin ekek ten out Kaleli?” 7Sakini, navong Paelet long kilea keke Iesu vi ten out Kaleli, out koa asuv houlu Herod Antipas mul losil kati, kei sila Iesu va ven Herod koa mul en out Serusalem en avong enek.
8Ka navong asuv houlu Herod les Iesu, kei si houlu mok. Veni tuetin tuai, kei long usili ka ien vati valesi en meten kati. Kei mundemi vahesa Iesu houmon etai merikel keke valesi. 9Sakini, Herod vis Iesu en tounah keil houlu, ka Iesu ro raeng enges. 10Asuv keil onen pris keil ka tiser keil ten Mengkatien keil onen Mosis koa amulomal vesesal ason selusien keil takeih va kat Iesu en meten Herod. 11Ka Herod ka meatin tavaeen keil onen emun akareni. Keil amumon tohtohien mini ka amusin en Iesu en more kaliko tai suval koa vi asuv houlu tai. Evus, asila risi va ven Paelet. 12En avong enesek, Herod ka Paelet lumai luvi timue tahos, ka mulamu en avong koanek luvi vativieh en keilu.
Asuv Paelet meng kati keke avalamun Iesu vaha avou vini en aiveave b
13Paelet vise ruain asuv keil onen pris keil, hetetamen keil onen Siu keil, ka meatin sav keil emun. 14Ka viteni min keil vit, “Kami mimulamun meatin ekek mai minau ka mivit kei mul vilehiles rendemien onen Siu keil mai tisaso. Ka kosa, en metomi, inau nalei rahit usite onen, ka narvotin etai tounah vatisa koa kami mivit kei mumoni. 15Asuv houlu Herod emun rovotin etai tounah vaha kati. Sakini, kei sila risi mai venir. Meatin ekek romumon etai tounah keke heha hemat veni. 16Sakini, nimeng kat meatin keil onak utetahi, hevus, nimaeni heha hemaluv.” 17 ▼18Hatte tas, vangi meatin keil enek aviso vina nesa avit, “!U vini meatin enek! !Maen Barabas heha hemaluv!” 19Barabas mul en eim takeih veni kei mu vini meatin tai mat en rea tai en out Serusalem va kat koakeil ten kavmen ten out Rom.
20Paelet ien vati vamaen Iesu vaha vamaluv, sakini vit risi min vangi meatin keil enek vit, “!Inau nimaen Iesu heha hemaluv!”
21Ka keil avikiti aviso keih tamun avit, “!Ti kati en aiveave! !Ti kati en aiveave!”
22Ka hatte etel eni, Paelet sak visi vaselus min keil vit, “?Kei mumon sa koa tisa? !Narvotin etai tounah koa kei mumoni keke vamat veni! Sakini, meatin keil onak keil iha utetahi. Hevus, nimaeni heha hemaluv.”
23Ka keil aviso keih tamun emau keke iti kat Iesu en aiveave. Amules amumoni va vio ... Paelet maeni. 24Sakini, Paelet meng kati keke Iesu hemat housil asa koa meatin keil evati. 25Kei maen meatin koa keil evati, kei va maluv. Vi kei koa muvini meatin tai en rea tai va kat kavmen ten out Rom. Ka Iesu esuk, kei sa lati va en hen meatin keil onen keke avati kati en aiveave musil asa koa vangi meatin keil evati.
Amuti kat Iesu en aiveave d
26Navong meatin tavaeen keil onen Paelet amulamun Iesu eva, avisu en meatin tai ten out Saerin koa mul mual vaha en out Serusalem, isen Saemon. Keil avuli kati, ka aling aiveave onen Iesu en vatisin keke vahousi vousil Iesu. 27Mari vangi meatin keil emun amusil Iesu uva. Ka tei en keil avi ahin keil koa amul amis ka amurang veni. 28Ka Iesu viles, les keil ka viteni min keil vit, “Ahin keil ten out Serusalem, minatangistei nau. Mihetang ven kami eris ka ven titami keil. 29Veni en avong keil tatisa koa mul mai, meatin keil ihiteni ihit, ‘Tahos imok ven ahin keil koa avi lumalum, koakeil arkurtei titiali, ka koakeil arrounattei en tivava tai.' 30Ka keil ihiteni mun min vatihou keil ihit, ‘!Alta kat komai!’ ka min hou keil ihit, ‘!Alling suain komai!’ 31?Veni munak aling ahang ten mahien ekek min meatin tai koa suval vatiai tai koa mimeasen koa romumontei tounah tatisa, Ahi heling ahang ten mahien sa min meatin tisa keil koa asuval vatiai keil koa amuko?”32En avong enek, keil amulamun meatin elu mun koa lumumon tounah tisa keke avou vini keilu vatal mini. 33Navong keil arokol out koa avise en ‘Asi ten Avat,’ keil amuti kat Iesu en aiveave. Ka meatin tatisa keilu, amuti kat keilu en aiveave elu mun. Tai en usite matu onen Iesu, ka tai en usite meil onen. 34Navong Iesu mul murur en aiveave, viteni vit, “Tata, konaleletei natisa kat meatin keil ekek veni keil areingeingen asa koa keil amul amumoni.”
Vesesal ven Iesu, meatin keil tavaeen ason dais keke avatiti vas eisin omon min keil. 35Ka rovitei soutin, meatin houlu amul amulomal keke avalesi. Hetetamen keil onen Siu keil aselus karen Iesu avit, “Miheles visi. Kei mutut moulien onen meatin sav keil. Tahos. !Ka munak vi Mesaea anatin koa Ahi rie lati, houtut moulien onen esuk!”
36Meatin keil tavaeen emun, amumon tohtohien mini. Keil uva veni, ka asan uaen takon mini vamuni. 37Ka keil avit, “!Munak kovi asuv houlu onen Siu keil, kutut moulien onom enges!” 38Evus, keil aling tisien tai nesa en aiveave onen koa vit, “Koanik vi Asuv Houlu onen Siu keil.”
39Tai en meatin tisa keilu koa mul murur en aiveave selus tisa min Iesu vit, “?Keik kovi Mesaea? !Munak vi anatin, kutut moulien onom ka onomal emun!”
40Ka teisav en keilu sel kati vit, “?Mukave? ?Keik kormetauntei Ahi? Mahien oratel vatte tas. 41Ka ialu, mal keke lokur mahien ekek veni ialu lomum tisa. Ka meatin enek romumon etai tounah vatisa.” 42Evus, kei viteni min Iesu vit, “Navong kumai kovi asuv houlu ka kokur keihoen, kindem kat inau li.”
43Ka, Iesu vit kesi mini vit, “Navat kati minuk, kosa, keik kito hetal minau en out tai koa tahos vis tahos imok.”
Matien onen Iesu e
44Mal en taviai, out viles mai vopoli ka mul mukonek rokol tri klok en mendilah, 45veni eai rokantei mun. Evus, kaliko koa mul koe out votut neim en Eim Votut onen Ahi sipasi elu. 46Ka en avong enek, Iesu viso va ven Ahi vit, “Tata, naling moulien onak en hem.” Navong viten koanik, Iesu leh kor en eang, ka mat.47Navong avat onen meatin tavaeen keil les asa koa kur out, vati lat isen Ahi ka vit, “Anatin eli, meatin ekek mal revi ka romumontei tounah vatisa.”
48Meatin sav keil houlu koa umai keke avalesi mukave Iesu vamat amul ekonek ka ales tounah keil koa kur out. Ka navong amul en sise keke avaha ris teim one, amul arangisi keih. 49Ka koakeil akilea revi Iesu, ral min ahin keil koa amul amusili navong aka en provins ten out Kaleli, keil amulomal soutin neli, ka ales tounah vasi koa kur out.
Arahin Iesu f
50Meatin tai mul ekonek, isen Siosep ten meteimal ten out Aramatea en provins ten out Sudea. Kei tahos ka sakien keil onen mal. Avaseini kei vi tai en kaonsel koa amumon kot onen Iesu, 51kei romaentei en lingkatien koa keil amumoni vaha kati. Kei emun mul rosin avong koa Ahi hesakin hiasuvien hemai hel en out netan. 52Kei va ven Paelet ka visi vamaen teiai onen Iesu mini. Ka Paelet maeni. 53Evus, Siosep va kulat teiai onen Iesu mita netan ran aiveave, kav koe en kaliko taoh tai. Evus, vousi va, ka lingi en valengeihat tai koa arei meseni tuai vi heite hau. 54Vi Fraede mendilah, ka Sabat mul mai vesesal koa Siu keil asakras avoum ien.55Navong Siosep vous teiai onen Iesu, ahin keil koa amusil Iesu aka en out Kaleli alehni keil rani. Ka keil ales valengeihat enek, ka mukave Siosep ling teiai onen Iesu ien. 56Evus, keil uva ris teim, ka asak mesen senta ka oel keke avasahula teiai onen Iesu eni.
Ka amuseh en Sabat suval koa avu Mosis meng kati.
Copyright information for
PMA